Dy të rinj shqiptarë janë dënuar nga gjykata britanike me nëntë vite burg secili, pasi u shpallën fajtorë për përdhunimin e një gruaja në tetor të vitit 2023.
Mediat britanike raportojnë se dy të rinjtë shqiptarë Redjon Cenaj dhe Mariglen Ferataj u dënuan 18 vite burg nga gjykata e Leicester Crown, pasi abuzuan seksualisht me një grua në banesën e saj ndërsa ajo ishte e pavetëdijshme dhe nën efektin e alkoolit.
Sipas mediave viktima ishte takuar në një klub nate fillimisht me Redjon Cenajn, me të cilin është parë duke hipur në taksi dhe të dy bashkë kanë zbritur në banesën e gruas.
Më pas me ta është bashkuar edhe Mariglen Ferataj.
Redjon Cenaj (majtas) dhe Martiglen Ferataj
Sipas dëshmisë së shoferit të taksisë, viktima nuk ishte vigjilente për atë që po ndodhte dhe nuk kishte mundësi të kuptonte situatën, gjë që u konfirmua edhe nga oficerët hetues. Më pas, brenda banesës së saj dy shqiptarët e sulmuan seksualisht.
Redjon Cenaj, 22 vjeç, nga HMP Leicester, u shpall fajtor për dy akuza për përdhunim dhe një për sulm seksual.
Ndërsa Mariglen Ferataj, 21 vjeç, banues në Beaufort Road, Leicester, u shpall fajtor për katër akuza për përdhunim dhe dy për dhunim.
Në dëshmitë e tyre, Ferataj pretendoi se marrëdhënia ka qenë me dëshirën e viktimës, ndërsa Cenaj mohoi të kishte pasur ndonjë kontakt seksual.
Megjithatë, provat filmike dhe dëshmitë e tjera e kundërshtuan këtë pretendim, duke çuar në shpalljen e fajësisë për të dy.
Ngjarja ka shkaktuar reagime në opinionin publik në Leicester, ndërsa autoritetet kanë përgëzuar punën e kryer nga ekipi hetues dhe dëshmitarët që ndihmuan në zbardhjen e çështjes.
