Ky është momenti kur Lucas Betancur dhe babai i tij arrestohen në banesën e tyre në Kolumbi. Babë e bir akuzohen si kokat e linjës së trafikut të qënieve njerëzore për
prostitucion në Shqipëri dhe në rajon.
Gazetari i Vizion Plus, Esido Barkaj, mëson se gjatë kontrollit në banesën në Kolumbi të Lucas Betancur dhe babait të tij, janë gjetur kode të Bitcoin, fatura të shumta të tranfertave të parave që dyshohet se vinin nga aktiviteti i prostitucionit. Përllogaritet se nga janari deri më tani janë tranferuar mbi 1 mln euro, kryesisht nga vendet e rajonit dhe nga Shqipëria drejt Kolumbisë.
Jo vetëm kaq, por janë zbuluar dhe disa banesa, apo hotele që përdoreshin si fole për prostitucionin në Tiranë për vajzat kolumbiane. Vizion Plus mëson edhe rolin e personave të arrestuar në Tiranë në këtë skemë kriminale.
Sipas burimeve, mësohet se i njëri prej të arrestuarve, Mirel Shperdheja, është pronar i një agjencie të pronave të paluajtshme, i cili kishte vendosur 15 banesa ne Airbnb në dispozicion për prostitucion.
Ndërsa Ilmar Gugashi, është pronai i hotelit në afërsi të Gjykatës së Lartë, godinë gjithashtu e përdorur në këtë aktivitet.
I arrestuari tjetër Dritan Suka, komunikonte drejtpërdrejt me Lukasin në Kolumbi, ndërkohë që jepte gjithashtu banesa me qira për vajzat që shfrytëzoheshin.
Në Shqipëri kolumbianët kishin të paktën 7 bashkëpunëtorë, të cilët ranë në pranga pas një hetimi 8 mujor të Antitrafiqeve e Tiranës dhe autoriteteve të huaja.
Ndërkohë 48 vajza të huaja, të cilat u shfrytëzuan për prostitucion, po hetohen në gjendje të lirë.
Për kryerjen e këtij aksioni të përbashkët, një delegacion i autoriteteve shqiptare, zv/drejtori i Policisë së Tiranës, Erjon Ismaili, shefi i sektorit të Antitrafiqeve, Arbër Zemani, prokurori Ritvan Suka, dhe oficerja shqiptare e kontaktit në Hagë, udhëtuan në Medelin ku morën pjesë në megaoperacionin në bashkëpunim dhe me agjencitë e tjera të huaja.
/vizionplus.tv
