Një aksident i rëndë rrugor ka ndodhur mëngjesin e sotëm në Çermë Sektor, ku një automjet me pasagjerë, pjesëtarë të së njëjtës familje, doli nga rruga dhe përfundoi në një kanal anës rrugës kryesore Çermë–Divjakë.
Ngjarja ndodhi rreth orës 05:00, duke tronditur komunitetin lokal. Sipas informacioneve paraprake, drejtuesi i mjetit, Ferit Mekshi, 63 vjeç, dyshohet se humbi kontrollin e makinës, çka çoi në devijimin e saj nga rruga.
Përplasja rezultoi fatale për një nga pasagjeret, Majlinda Sula, 47 vjeçe, e cila humbi jetën si pasojë e plagëve të rënda të marra. Tre persona të tjerë mbetën të plagosur, përfshirë drejtuesin e automjetit, një të mitur 15-vjeçar dhe pasagjeren Afërdita Mekshi, 37 vjeçe.
Të dëmtuarit u transportuan menjëherë në spital, ku ndodhen nën kujdesin e mjekëve. Burime spitalore bëjnë me dije se gjendja e tyre shënohet si e rëndë, por mjekët po bëjnë përpjekje për stabilizimin e tyre.
Ndërkohë, autoritetet kanë nisur hetimet për të zbardhur shkaqet dhe rrethanat e plota të aksidentit.
/vizionplus.tv
