Detaje të reja janë zbardhur nga operacioni i Antidrogës “Blue Punisher”, i cili çoi në arrestimin e Elvis Lezos dhe Bujar Lezos. Sipas hetimeve, dy shtetasit prej disa kohësh ishin të përfshirë në shitjen dhe shpërndarjen e lëndëve narkotike, kryesisht të llojit ekstazi.
Burime hetimore bëjnë me dije se lënda narkotike silllej nga Italia në rrugë tokësore. Në shtetin fqinj, ata siguronin si kokrra ekstazie ashtu edhe pluhur, i cili më pas përpunohej dhe përgatitej në banesën e tyre në zonën e Ali Demit, të përshtatur enkas për këtë veprimtari kriminale.
Emri i operacionit “Blue Punisher” është vendosur për shkak të mbishkrimit që mbanin në sipërfaqe tabletat e ekstazisë. Dyshohet se Elvis Lezo ishte personi kryesor i lidhur me një grup tjetër kriminal në Itali dhe se ai ka precedent penal të mëparshëm.
Sipas policisë, droga shpërndahej kryesisht në lokalet e natës në Tiranë, ndërsa një tabletë ekstazi shitej me çmimin rreth 3 mijë lekë të reja. Gjatë operacionit u sekuestruan 2200 tableta të dyshuara ekstazi (MDMA) dhe dy celularë, ndërsa materialet procedurale i janë referuar Prokurorisë për veprime të mëtejshme.
/vizionplus.tv
