Dy efektivë policie janë përplasur fizikisht me njëri-tjetrin në një ambient dyqani në rrugën “Nikolla Tupe”.
Agjencia e Mbikëqyrjes Policore në një njoftim për media bën me dije se Rigers Iljazi, efektiv i FNSH dhe Vladimir Laska i Forcave Operacionale janë konfliktuar së bashku për motive të dobëta. Në mes të debatit është përfshirë edhe vëllai i efektivit të FNSH-së Marjus Iljazi.
Të tre këta shtetas janë proceduar në gjendje të lirë, ndërsa Drejtoria e Standardeve Profesionale në Policinë e Shtetit ka nisur hetimin disiplinor ndaj dy efektivëve të Policisë.
Tiranë
Agjencia e Mbikëqyrjes Policore (AMP) Tiranë ka referuar në Prokurori materialet proceduriale në gjendje të lirë në ngarkim të 2 punonjësve të Policisë dhe 1 shtetasi, konkretisht:
– R.I., 33 vjeç, efektiv i FNSH, i dyshuar për ‘Kanosje”;
– V.L. 44 vjeç, efektiv i Forcës së Posaçme Operacionale, i dyshuar për ‘Kanosje” e “Dëmtime të tjera me dashje”;
– M.I. 33 vjeç, i dyshuar për “Kundërshtim i punonjësit të rendit publik” dhe “Dëmtime të tjera me dashje”.
Nga veprimet hetimore rezulton se punonjësi i policisë V.L., jashtë shërbimit, është konfliktuar e përplasur fizikisht, për motive të dobëta, së pari me shtetasin M.I., në një dyqan në rrugën “Nikolla Tupe”. Më pas në debat është përfshirë dhe punonjësi tjetër i Policisë, R.I., edhe ai jashtë shërbimit.
Me marrjen e njoftimit kanë mbërritur shërbimet e Policisë së Komisariatit Nr. 2 Tiranë dhe forcat “Shqiponja”, të cilat kanë shoqëruar palët deri në përfundim të veprimeve të para hetimore.
Ndërkohë Drejtoria e Standardeve Profesionale në Policinë e Shtetit ka nisur hetimin disiplinor ndaj dy efektivëve të Policisë.
Materialet janë referuar në Prokurorinë e Tiranës.
