Për të dytën ditë radhazi, Ministria e Bujqësisë ka konfirmuar se nuk ka vatra të reja të gripit të shpendëve, përveç katër qarqeve, Durrës, Fier, Korcë dhe Dibër.
Autoriteti Kombëtar i Ushqimit është duke monitoruar situatën në terrën në ferma dhe stabilimente.
“Në 24 orët e fundit nuk kemi asnjë rast të ri të konfirmuar. Nuk kemi vatra të reja infeksioni. Nuk kemi asnjë stabiliment me drejtim prodhim për mish të infektuar. Vazhdon monitorimi i vazhdueshëm në Organizatën Botërore të Shëndetit të Kafshëve mbi situatën epidemiologjike të shfaqjes së influencës aviare, me qëllim marrjen e masave kufizuese për importin në vend. Vazhdon procesi për fuqizimin e flotës së veterinerëve zyrtarë Jemi në monitorim të vazhdueshëm të të gjithë territorit”, u shpreh zv.ministrja Ermira Gjeci.
Por, edhe pse autoritetet kanë bërë thirrje që të gjitha bashkitë të marrin masa për të ndaluar shitjen dhe tregtimin e shpendëve në treg të hapur, këto pamje vijnë nga Klosi. Banorët e fshatrave në këtë zonë vijojnë të sheshin shpendët e oborrit buzë rrugës.
Kjo e diel, mesa duket ka qenë një ditë normale për banorët e kësaj zone, që vijojnë shitjen e shpendëve në treg të pakontrolluar.
Ministria e Bujqësisë rikujton edhe një herë masat që konsumimi i produkteve të mishit të shpendëve si dhe vezës të bëhet pas gatimit në temperaturë më të lartë se 70 gradë.
