Partia Demokratike ka nisur të zhvillojë zgjedhjet e saj primare në 12 qarqet e vendit.
Votimi nisi në orën 08:00 dhe mbyllet në orën 18:00. Gazetarët e Vizion Plus janë duke ndjekur procesin e Primareve nëpër qarqe.
Qarku Tiranë- Në garë janë 81 kanddiatë. Procesi ka nisur prej orës 08:00 të mëngjesit dhe vijon pa probleme
Qarku Fier- I pranishëm është drejtuesi politik i qarkut, Gazmend Bardhi, i cili dha udhëzimet për mbarëvajtjen e procesit të votimit. Në këtë raund primar, garojnë 22 kandidatë. Në selinë e degës Fier pritet që rreth 1000 anëtarë të hedhë votën për të zgjedhur kandidatin e preferuar. I pari që ka hedhur votën ishte drejtuesi politik Gazmend Bardhi, i cili e pasoi më vonë me pjesëmarrësit e tjerë dhe kandidatët.
Qarku Lushnje- Që në nisje të procesit të votimit, është vënë re një numër i madh anëtarësh që votojnë për të preferuarin e tyre. Procesi po vijon normalisht dhe në një atmosferë të qetë, por dukshëm është padurimi i anëtarëve për të hedhur votën. Disa nga kandidatët e Lushnjes ishin të pranishëm në ambientet e jashtme të selisë për të ndjekur vijimin e procesit. Sajmir Korreshi, Eduart Sharka, Ilda Dhori, Elisabeta Rredhi, Gentian Çela dhe Sevin Serjani janë gjashtë emrat nga zonat Lushnje e Divjakë që presin votat e anëtarësisë për në Primaret e PD.
Qarku Elbasan- Procesi po vijon pa probleme. Gjithsej, në të gjithë qarkun e Elbasanit janë 22 kandidatë për të cilët demokratët do të japin sot votën e tyre. Në qytetin e Elbasanit janë rreth 4000 anëtarë me të drejtë vote, ndërkohë që në të gjithë qarkun janë rreth 12,900 anëtarë me të drejtë vote.
Qarku Berat- Proçesi është i organizuar mbi formulën “Një anëtar, një votë”, ku çdo anëtar i Partisë Demokratike ka të drejtë të votojë vetëm një prej kandidatëve në fletën e votimit. Në fletën e votimit gjenden të renditur të gjithë kandidatët e qarkut, të dalë nga degët Berat, Kuçovë, Poliçan, Dimal dhe Skrapar. Në garë për këto primare janë 10 kandidatë.
Qarku Dibër- Në listë janë 13 kandidatë që do të kërkojnë votën e anëtarësisë për të qenë zyrtarisht kandidat për 11 Majin. Procesi i votimit është i ndarë në 4 qendra: Burrel, Klos, Bulqizë dhe Peshkopi. Janë 6,500 anëtarë me të drejtë vote që do të vendosin se kush do të jetë në listën përfundimtare të 11 Majit nga koalicioni opozitar. Pjesëmarrja e anëtarësisë ka qenë e lartë në orët e para të procesit.
Qarku Vlorë- Në listë janë 13 kandidatë për të cilët votohet në primaret e PD në rang qarku. Sipas kryetarit të PD Dega Vlorë, Hysni Sharra, procesi ka nisur qetë dhe pa probleme, ndërsa anëtarët e PD kanë nisur prej mëngjesit për të votuar. Në listën e kandidatëve për këto primare spikatin edhe emrat e ish-kryetares së degës Sarandë, Afrovita Dhimojani, deputetes Ina Zhupa dhe gjeneralit Pirro Ahmetaj. Rezultati pritet të bëhet i ditur ditën e diel.
Qarku Korçë – Gjithsej janë 19 kandidatë që garojnë për të qenë kandidatë të Partisë Demokratike në zgjedhjet e 11 majit. Votimi për kandidatët e preferuar do të kryhet në të gjitha degët e Partisë Demokratike të qarkut.
Qarku Shkodër – Janë 31 emra në garë, ndërsa kanë të drejtë vote 7 mijë anëtarë të kësaj force politike. Primaret e këtij viti kanë një risi, pasi do të votohet sipas parimit “një anëtar, një votë”, ku në listë do të përzgjidhet vetëm një emër i preferuar.
Qarku Lezhë – Në garë janë 19 kandidat, ndërsa numri i anëtarëve në rang qarku është 7,600. Kryetarja e Partisë Demokratike, Donika Ndoj, thotë se procesi ka nisur në orën 8:00 dhe po vijon normalisht pa probleme, ndërsa bëri thirrje ndaj çdo anëtari të PD që të marrë pjesë në këtë proces mjaft të rëndësishëm për demokracinë.
/vizionplus.tv
