Ish-deputeti i Partisë Demokratike, Bardh Spahia reagoi pas vetëvrasjes së ndodhur mbrëmjen e të mërkurës në spitalin “Shefqet Ndroqi”.
Spahia tha në “Facebook” se dy ngjarjet e rënda duhet të shërbejnë për të vënë në lëvizje Ministrinë e Shëndetësisë dhe autoritetet e tjera shëndetësore.
Sipas tij, është detyrë e tyre të vendosin edhe psikologë në spitalet ku trajtohen pacientët e infektuar.
“Rasti i dytë në më pak se tre javë, duhet të sjellë një impenjim serioz të autoriteteve dhe një plan konkret për të trajtuar, edhe një rëndim të gjendjes psikologjike për shkak të izolimit e vështirësisë së sëmundjes! Me probleme paraprake apo jo, fakt është që një 29 vjecar dhe një 65 vjecar zgjodhën t’i japin fund jetës, në vend të kurimit mjekësor! Drejtori i spitalit e Ministria e Shëndetësisë duhet të mendonin për situatën e pacientëve dhe të merrnin masat përkatëse për të trajtuar anën psikologjike të pacientëve! Asnjëri nga dy spitalet COVID nuk ka psikolog! Kjo situatë nuk mund të anashkalohet me justifikimin, se pacientët që i dhanë fund jetës kishin probleme paraprakisht! Kujdesi për shëndetin mendor ndaj pacientëve të tillë ka munguar krejtësisht! Edhe sa pacientë me COVID-19 duhet të humbin jetën që qeveria të reagojë duke marrë masa konkrete?”
Dy vetëvrasje kanë ndodhur në thuajse dy javë në spitalin e Sanatoriumit. Të dy pacientët ishin të shtruar aty sepse kishin dalë pozitivë me COVID-19. Por si Xhino Koca, ashtu edhe Hasan Mira, nuk ishin në gjendje të rëndë për shkak të sëmundjes.
