Dënimi i Edison Memollës me një vit burg nga Gjykata e Posaçme ka bërë që Rrogozhina të mbetet pa kryetar bashkie.
Kjo bashki e qarkut të Tiranës tashmë duhet të zhvillojë sërish votime për të zgjedhurin vendor, ndërsa Prefekti i Tiranës duhet të çojë vakancën pranë Këshillit të Ministrave.
Do të jetë qeveria ajo që do të njoftojë Presidentin e vendit për mungesën e kryebashkiakut, teksa kreu i shtetit ka kohë 48 orë për të dekretuar datën e zgjedhjeve të reja.
Këto zgjedhje duhet të mbahen jo më herët se 30 ditë dhe jo më larg se 45 ditë që nga data e njoftimit të ndërprerjes së mandatit të kryebashkiakut.
Megjithatë, një skenar tjetër mbetet edhe ai i kryetarit të komanduar. Këshilli Bashkiak i Rrogozhinës, ka të drejtën të komandojë një prej nënkryetarëve për të drejtuar institucionin vendor deri në datën e zgjedhjeve te rregullta.
Megjithatë pritet të shihet skenari që do të zgjidhet nga qeveria, ndonëse sipas ligjit, Rrogozhina duhet të shkojë në zgjedhje vendore të parakohshme.
Kjo bashki mban një rekord për zgjedhjet lokale. Në vitin 2019 u mbajtën zgjedhjet e rregullta vendore ku fitues ishte Haxhi Memolla, i cili humbi jetën në vitin 2020.
Kjo solli sërish zgjedhje në vitin 2022. Një vit më pas, në maj, qytetarët e Rrogozhinës votuan sërish në zgjedhjet e plota vendore të 2023-shit, por me vendim të Kolegjit Zgjedhor ata sërish votuan ne korrik ku fitues ishte Edison Memolla.
