900 familje në fshatrat Dvoran e Kamenicë në Korçë së shpejti do të kenë 24 orë ujë të pijshëm.
Kjo falë projektit për ndërtimin e ujësjellësit i cili ka nisur zbatimin në terren me një vlerë prej 2 milionë euro të financuara nga qeveria shqiptare dhe bashkia e Korçës.
Projekti përfshin ndërhyrje tërësore që nga burimet, ndërtimi i depove të reja, si dhe linjat e transmetimit nga burimet te depot e më pas edhe në çdo familje të zonës.
Kryebashkiaku Sotiraq Filo gjatë inspektimit të punimeve e quajti projektin një nga më madhorët që është duke u realizuar në fshatrat e bashkisë së Korçës në fushën e ujësjellës kanalizimeve:
Punimet për ndërtimin e ujësjellësit të ri që do të zgjidhë përfundimisht furnizimin me ujë të pijshëm 24 orë për rreth 3000 banorë të dy fshatrave, janë mjaft voluminoze duke përfshirë shtrirjen e 51 km linja, nga të cilat 34 km janë tubacione kryesore dhe 17 km janë linja të brendshme si dhe të gjitha lidhjet e ujësjellësit nëpër banesa e biznese.
Por kryebashkiaku Filo thotë se bashkia e Korçës synon që të nisë ndërhyrjen në rrjetin e ujësjellësave edhe në katër fshatra të tjerë Goskovë, Shamoll, Malavec dhe Qatrom:
Punimet në ujësjellësin e ri që do të furnizojë Dvoranin dhe Kamenicën e kanë afatin e përfundimit një vit, por firma synon që ta përfundojë në muajin nëntor, për shkak edhe të kushtëve të terrenit dhe intensitetit të punimeve.
