Në Prokurorinë e Posaçme nuk ka asnjë hetim ndaj Kryeministrit Edi Rama. Deklarata është bërë nga drejtuesi i SPAK, Altin Dumani, i cili sqaroi edhe akuzat e opozitës gjatë raportimit vjetor në Parlament.
Sipas tij, prokurorët kryejnë hetime të thelluara duke mos përjashtuar asnjë emër.
“Për Prokurorinë e Posaçme nuk ka të paprekshëm. Për prokurorët e posaçëm nuk kanë rëndësi emrat, por veprat penale”, tha Dumani.
Sa i përket deklaratave të ish-numrit dy të qeverisë Arben Ahmetaj, Dumani theksoi se SPAK e fton atë të bëhet bashkëpunëtor i drejtësisë.
“Deklarimet publike vlerësohen rast pas rasti, për një person që sot është në kërkim ndërkombëtar”, u shpreh kreu i SPAK.
Dumani shpjegoi gjithashtu se hetimet për inceneratorët vijojnë por nëse do të merret në pyetje Veliaj mbetet për t’u parë në të ardhmen.
“Dua të them se, siç ju e dini, hetimet paraprake nuk kanë përfunduar për këto procedime penale”, deklaroi Altin Dumani.
Akuzave se Dumani ka kërkuar zgjatje të mandatit të prokurorëve për të qëndruar më gjatë në detyrë, kreu i SPAK i dha këtë përgjigje.
“I kam kërkuar disa herë kuvendit të shqyrtojë mundësinë e rishikimit të mandatit të prokurorit të posaçëm dhe jo në pak raste është aluduar se bëj për interesin tim personal, nëse politika e kushtëzon apo ka mendim se zgjatja e mandatit lidhet me emrin tim, unë nuk rikandioj”, u shpreh Dumani.
Drejtuesi i institucionit të Prokurorisë së Posaçme nënvizoi gjithashtu se vendimi për detyrim paraqitje ndaj kryedemokratit Sali Berisha varet nga Gjykata dhe se institucioni që ai drejton nuk merr asnjë vendim për heqje mase sigurie.
/vizionplus.tv
