Kreu i Partisë Agrare Ambientaliste komentoi sherrin e ndodhur këtë të premte në zyrat e Frymës së Re Demokratike mes presidentit Ilir Meta dhe Policisë Bashkiake.
Duka u shpreh në “Facebook” se kryeministri Edi Rama shfaqi një sjellje të tillë për shkak të kalimit të FRD në koalicion me opozitën. Ai u bëri thirrje ndërkombëtarëve të reagojnë.
“Një akt arbitrar që tregon mënyrën abuzive me të cilën vepron Edi Rama, për sa kohë FRD ishte në koalicion me PS-në, nuk ua prekte zyrat, tani që ka kaluar në opozitë i ushtrojnë presion duke i larguar nga zyrat. Ky është një provokim që synon përkeqësimin e klimës zgjedhore, një sulm politik për të shmangur vëmendjen nga dështimi katastrofik i Edi Ramës nëpërmjet goditjeve të tilla. Unë i bëj thirrje komunitetit ndërkombëtar që të reagojë mbi këtë sulm politik, i cili është në vijmësi të përpjekjeve të Edi Ramës për të kompromentuar zgjedhjet e 25 prillit, sikurse e kam denoncuar në rastin e Shijakut, ku krimi dhe përfaqësues të Rilindjes vijojnë simbiozën e tyre në kurriz të zgjedhjeve të lira.”
