Drejtori i Policisë së Tiranës, Rebani Jaupi zbuloi të tjera detaje të rënda nga ngjarja tragjike e ndodhur në Kombinat mbrëmjen e kësaj të enjteje.
Jaupi tha në një deklaratë për mediat se njëra nga vajzat është gjetur e shtrirë në krevat dhe e mbuluar me batanije e jorganë.
Ai pohoi se në banesë janë gjetur shënime me përmbajtje fetare. Sipas Jaupit, paraprakisht dyshohet për vetëflijim.
“Vëllai i viktimës ka njoftuar në polici se nuk kam kontakt me motrën dhe dy mbesat e mia. Është njoftuar zjarrfikësja. U ngrit hetimor. Shkuam në banesë dhe në pamundësi për të hapur derën kemi hyrë nga dritarja. Menjëherë konstatuam të zonjën e shtëpisë të vdekur, një nga vajzat në gjendje kritike dhe në një ambient tjetër në krevat është gjetur e mbuluar me batanije dhe jorgan vajza tjetër. Po kryhen veprime në vendngjarje. Sipas ekspertit mjeko ligjor dy viktimat nuk kanë shenja dhune dhe dyshohet se janë vetëflijuar. Do tju njoftojmë konkluzionet e mjekut ligjor. Mendohet për një vetëflijim. Kemi gjetur shënime të ndryshme, me përmbajtje fetare. Do të bëhet ekspertimi i telefonave dhe kompjuterët. Të dy vajzat kanë qenë të arsimuara, por kanë qenë të papuna. Ka pasur shenja të mos-ushqyerjes ditët e fundit.”
