Kryetari i Partisë Demokratike, Sali Berisha, ishte sot në folltoren e radhës, me qytetarët e Elbasanit.
Ai u ndal te sfidat që, sipas tij, ka kaluar PD ndër vite dhe përsëriti akuzat ndaj qeverisë për procesin zgjedhor. Berisha theksoi se demokratët kanë qëndruar të bashkuar pavarësisht përpjekjeve për t’u përçarë, duke i cilësuar “të pamposhtur”. Ai renditi një sërë praktikash që i konsideron shkelje të rënda në zgjedhjet e fundit, duke u ndalur tek përdorimi i burimeve shtetërore, presionet ndaj opozitës dhe influenca e grupeve kriminale.
Berisha: Vazhduan të na rrëmbenin emrin, të na rrëmbenin flamurin. Dështuan se qëndruam. Dështuan se nuk u dorëzuam. Na përçanë, u bashkuam. Janë të vërteta këto. Pse po ndalem këtu në këtë histori? Po. Ne kemi një histori. Dhe historia jonë po të përmblidhet me një fjalë, është; Të pamposhtur.
Të pamposhtur. Të pamposhtur. E faktuam ne këtë. E kemi faktuar ne këtë. Erdhën zgjedhjet.
Miq, për çdo demokrate e demokrat, çdo qytetar dhe qytetare mbështetës të Partisë Demokratike dhe opozitës, kam vetëm një lutje: Sali Berisha në mënyrën më të përsëritur, jo një herë, po dhjetëra e dhjetëra herë, ju ka deklaruar dy gjëra.
Me Edi Ramën zgjedhje nuk ka. Asnjëherë. Me Edi Ramën zgjedhje nuk ka.
Sikundër zotimi im solem se, do të mbroj votën tuaj. Se cilat ishin zgjedhjet, ftoj çdo votues, çdo zgjedhës të këtij qyteti të bekuar dhe të këtij rrethi, të pyesë veten kaq: A mund të quhen zgjedhje ato në të cilat shteti mobilizon të gjitha burimet, potencialin e saj në garë elektorale.
A mund të quhen zgjedhje ato kur shteti organizon për të ndikuar tek qytetarët në votën e tyre, në periudhë të ndaluar me ligj, 4530 aktivitete. Të gjitha me paratë e taksapaguesve, përfshi këtu ditën e votimit ‘Giro D’Italia’ me 7 milionë euro. Organizatë private. Pra nëqoftëse ti një opozitë e merr të dekapituar dhe e çon në zgjedhje, a mund të imagjinohet të flitet për zgjedhje.
A mund të quhen zgjedhje ato në të cilat nga paratë tuaja të taksapaguesve për të blerë votat shpërndanë, 100 euro për 760 mijë pensionistë në mes të fushatës. A mund të quhen zgjedhje ato në të cilat për të rrëmbyer votat, fal të gjitha gjobat dhe kamatat, të cilat tani faktohet se ishin 2 miliardë euro.
A mund të quhen zgjedhje, zgjedhje të cilat Edi Rama, punonjësit që ne paguajmë me taksat tona, i shndërron në polici elektorale, në terroristë elektoralë. Gjithçka që po them është e sanksionuar në raportet ndërkombëtare. Dhjetëra mijëra punonjës, presione nga më të ndryshmet.
