Donald Trump vijon me emërtimet. Zgjedh ish gjeneralin Keith Kellogg për konfliktin Rusi -Ukrainë
Presidenti i zgjedhur amerikan, Donald Trump ka nominuar ish-gjeneralin Keith Kellogg, për të shërbyer si i dërguar i posaçëm i Shteteve të Bashkuara për Ukrainën dhe Rusinë.
Lajmin e bëri të ditur vetë Trump në rrjetin social truth social.
“Keith ka karrierë të shquar ushtarake dhe në fushën e biznesit duke përfshirë shërbimin në role shumë të ndjeshme të sigurisë kombëtare gjatë administratës sime të parë”, shkruan Trump në postimin e tij.
Më herët gjatë këtij muaji u aludua se Trump do të nominonte Richard Grenellin për këtë pozitë.
Emërimi i Kellogg vjen pasi Trump, gjatë fushatës së tij presidenciale, e kritikoi SHBA-në për mbështetjen në vlerë miliarda dollarësh që i ka dhënë Ukrainës që nga fillimi i pushtimit të plotë nga Rusia në shkurt 2022.
Sakaq disa nga nominuarit dhe të emëruarit e kabinetit të ardhshëm të Presidentit të zgjedhur amerikan, kanë qenë në shënjestër të kërcënimeve me bombë, bëri me dije ekipi i Trump këtë të mërkurë.
Byroja Federale Amerikane e hetimeve (FBI) tha se është duke kryer hetime për këtë.
