Ajo që tërhoqi vëmendje në protestën e zhvilluar pak ditë më parë kundër përdhunimeve ishte mënyra se si një e re kishte zgjedhur të protestonte.
Një ditë pasi doli e zhveshur në sheshin “Skënderbej”, ajo ka reaguar përmes një videoje në rrjetet sociale, ku sqaronte arsyen pse kishte zgjedhur të protestonte në këtë mënyrë.
Ajo theksoi se “nuditeti nuk është turp, kurse përdhunimi po”.
E reja fajësoi vajzat dhe gratë për rastet e abuzimeve seksuale, me argumentin se nuk kanë ditur të edukojnë mirë djemtë e tyre.
“Meshkujt janë fëmijët tanë, fëmijët e një gruaje. Nëse ata nuk janë të aftë, nëse nuk janë sot të denjë për shoqërinë tonë sot, është sepse ne nuk e kemi bërë punën si duhet”, shkruhej në pankartën që ajo mbante në dorë.
Po ashtu, ajo ka treguar se në moshën 15-vjeçare e ndiqnin disa trafikantë.
“Doni edhe listën e njerëzve që më kanë ngacmuar mua seksualisht?! Kam pasur zhvillim të hershëm që 12 vjeç. Kur isha 15 më ndiqnin një rrjet trafikantësh. I doni me emra mbiemra, ti vrisni edhe ata? Ligji i karmës thotë që nëse ne një gjë na përsëritet disa herë do të thotë që ne nuk e kemi marrë mësimin. Kuptoni forcën tuaj! Meshkujt janë fëmijët tanë, nëse janë ashtu siç janë, do të thotë që ne nuk i kemi edukuar. Sot ne mbajmë përgjegjësi për çdo fëmijë që përdhunohet. Po shisni shpirtin vetëm që mos ta dëgjojnë komshinjtë, për llafet e botës. Është faji jonë, sepse meshkujt janë fëmijësh tanë”, vijoi ajo.
