Udhëheqësit e vendeve anëtare të NATO-s janë mbledhur sot në Hagë për një samit dyditor të Aleancës së Atlantikut të Veriut..
Ish-shefi i Shtabit të Përgjithshëm të FA, Bardhyl Kollçaku, tha se ky samit po mbahet në një moment shumë të rëndësishëm, duke iu referuar tensioneve në Lindjen e Mesme dhe luftës Ukrainë-Rusi.
Në një lidhje të drejtpërdrejtë në edicionin qendror të lajmeve në Vizion Plus me moderator Aleksandër Furxhi, Kollçaku nënvizoi se Aleanca zotohet që deri në vitin 2035 do të rrisë shpenzimet për buxhetin e mbrojtjes deri në 5%, teksa shtoi se ky samit do të mbahet mend si samiti i rritjes së shpenzimeve për mbrojtje
Sa i përket pritjes së samitit të NATO-s në Shqipëri në vitin 2027, deputeti Kollçaku u shpreh se Tirana do të jetë kryeqendra jo vetëm evropiane, por edhe globale.
Intervista e plotë:
Si e shikon Shqipëria këtë samit të NATO-s që mbahet në një situatë ndërkombëtare të mbartur me konflikte, si në Lindjen e Mesme ashtu edhe në Ukrainë?
Kollçaku: Samiti mbahet në një moment tepër të rëndësishëm, jo vetëm për shkak të konfliktit që po vazhdon prej tre vitesh në Ukrainë, por edhe për shkak të dy konflikteve të reja në Lindjen e Mesme. Kështu që situata gjeopolitike është shumë e trazuar. Kërcënimet dhe rreziqet për lirinë dhe sigurinë e 1 miliard banorëve që janë nën ombrellën e NATO-s janë në kërcënim të vazhdueshëm. Vëmendja për këtë samit është shumë e lartë, shumë e lartë për të gjitha vendet anëtare. Shqipëria është rreshtuar me iniciativën e presidentit Trump, por edhe të sekretarit të përgjithshëm të Aleancës, që nxisin vendet për të rritur shpenzimet për mbrojtjen. Këtu kemi parasysh angazhimin që do të merret nesër, ku Aleanca zotohet që deri në vitin 2035 do të rrisë shpenzimet për buxhetin e mbrojtjes deri në 5%. Nga këto, 3.5% do të jenë shpenzime direkte ushtarake dhe 1.5% për të përmirësuar infrastrukturën, qëndrueshmërinë, mbrojtjen kibernetike, portet, aeroportet, arteriet kryesore të lëvizjes së forcës nga Amerika për në Evropë dhe nga Evropa për në pjesën lindore të Aleancës, andej nga vjen kërcënimi kryesor. Ky do të mbahet mend si samiti i rritjes së shpenzimeve për mbrojtje.
Në 2027 pritet që Tirana të jetë pritëse e samitit të NATO-s. Haga është gati si një qytet i rrethuar me 12 mijë ushtarë dhe policë që sigurojnë shefat e shteteve aty. Është një buxhet rreth 18 milionë dollarë për organizimin e këtij samiti. Si mund të jetë Tirana në 2027 në këtë kuptim?
Kollçaku: Tirana i ka dhënë provat para dy vitesh, ku pati një angazhim të ngjashëm. Erdhën liderët kryesorë evropianë, dhe para një muaji ishte takimi i Komunitetit Politik të BE-së. Kështu që Tirana ka krijuar një eksperiencë të shkëlqyer jo vetëm për infrastrukturën, por edhe për protokollin, organizimin, menaxhimin, por edhe për sigurinë që ka vendi ynë. Ky do të jetë një mundësi që Shqipëria të vendoset ndër vendet që mund të marrin përsipër organizimin dhe kryerjen e aktiviteteve të tilla. Kjo e kthen vendin tonë në kryeqendrën botërore, të paktën për dy javë apo një muaj që do të zhvillohen këto takime të nivelit të lartë, ku veç krerëve të shteteve janë edhe ministrat e Jashtëm, ministrat e Mbrojtjes, shefat e shtabeve, agjencitë e sigurisë, gazetarë dhe vendet partnere. Pra, do të jetë kryeqendra jo vetëm evropiane, por globale e zhvillimeve të vitit 2027.
/vizionplus.tv
