Kryeministri Edi Rama është shprehur se të gjitha uniformat e shtetit shqiptar do të prodhohen në Shqipëri dhe nga kompani shqiptare, duke theksuar se bëhet fjalë për një proces që ka nisur tashmë dhe jo për një projekt të së ardhmes.
Në fjalën e tij, para grupit parlamentar socialist, Rama tha se gjithashtu ka nisur puna për ndërtimin e dronëve inteligjentë, duke shtuar se nuk bëhet fjalë për pajisje të thjeshta, por për dronë të sofistikuar, të prodhuar në vend.
Sipas tij, vendi ynë synon të zhvillojë një industri ushtarake kombëtare që të prodhojë gjithçka që është e mundur brenda territorit shqiptar.
Rama: Të gjitha uniformat e shtetit shqiptar do të prodhohen në Shqipëri dhe nga shqiptarët. Kjo kompani do të prodhojë uniforma edhe për vendet e tjera. Kjo po ndodh, nuk është një gjë që do ta bëjmë në të ardhmen. Prodhimet e kësaj kompanie do të dalin brenda këtij viti. Jemi budallenj ne që për çdo lloj droni duhet t’i blejmë te të tjerët? Kemi filluar punën për të ndërtuar dron inteligjent në Shqipëri, dhe jo dron dosido, dron të sofistikuar. Nëse do ishim një forcë që punon për të marrë lekë, ne nuk do ngrinim një sistem të tërë prokurimesh që po shkon drejt mbylljes së të gjitha hapësirave për abuzimet. Ne do të jemi një industri ushtarake që do të prodhojmë gjithçka që prodhohet në vend.
