Kreu i Shtëpisë së Bardhë Donald Trump ka bërë me dije se do t’i kërkojë agjencive federale amerikane, përfshirë këtu Departamentin e Mbrojtjes, që të nisin “procesin e identifikimit dhe publikimit” të dosjeve qeveritare të cilat lidhen me jetën jashtëtokësore.
“Bazuar në interesin e jashtëzakonshëm të treguar, unë do t’i udhëzoj Sekretarit të Luftës dhe Departamenteve dhe Agjencive të tjera përkatëse që të fillojnë procesin e identifikimit dhe publikimit të dosjeve qeveritare që lidhen me jetën aliene dhe jashtëtokësore, fenomenet ajrore të paidentifikuara dhe objektet fluturuese të paidentifikuara si dhe çdo informacion tjetër që lidhet me këto çështje shumë komplekse, por jashtëzakonisht interesante dhe të rëndësishme”, tha Trump.
Më herët para gazetarëve Trump ka akuzuar ish presidentin Barack Obama se ka publikuar informacion të klasifikuar kur ka konfirmuar ekzistencën e jetës jashtëtokësore.
“Ai dha informacion të klasifikuar. Nuk supozohet ta bëjë këtë. Ai bëri një gabim të madh. E hoqi nga informacioni i klasifikuar. Jo, nuk kam një mendim për këtë. Nuk flas kurrë për këtë. Shumë njerëz flasin. Shumë njerëz e besojnë”, shtoi Trump.
Obama ka pohuar në një intervistë se mendon se alienët ekzistojnë, edhe pse nuk i ka parë kurrë.
Ka pasur një rritje të ndjeshme të interesit publik për UFO-t në SHBA këto vitet e fundit, nxitur sidomos në 2017-tën nga raportimet mbi një program sekret të Pentagonit që hetonte dëshmitë e pilotëve dhe anëtarëve të tjerë të ushtrisë amerikane, të cilët pretendonin se kishin parë objekte të çuditshme në ajër./vizionplus.tv
