Shoferi polak i kamionit që u përfshi në aksidentin ku u godit furgoni që transportonte tifozët e PAOK-ut në Rumani shprehet i tronditur nga ngjarja tragjike me shtatë viktima.
“Kam drejtuar kamion për 34 vjet dhe nuk kam parë kurrë diçka të tillë. Kam bërë mbi 1.000.000 kilometra dhe kjo ishte hera e parë që u përballa me një situatë të tillë,” tha ai për gazetën rumune Libertatea, duke përshkruar momentet dramatike në autostradën DN6, e njohur nga vendasit si “rruga e vdekjes”.
Mediat rumune raportojnë se aksidenti i djeshëm është më i rëndë që ka ndodhur në qarkun e Timișoarës në të paktën 20 vitet e fundit.
Sipas dëshmisë së një të pranishmi, shoferi i furgonit duket se ka bërë manovra për të kuptuar kur ishte momenti i duhur për të parakaluar. Dëshmitari, i cili ishte dy automjete pas furgonit, tha se shoferi, duke kuptuar se nuk mund ta përfundonte parakalimin, ka hyrë në të djathtë, duke u përplasur me të.
“Kur hyri në të djathtë, u përplas me kamionin e kuq,” tha dëshmitari, i cili ka thirrur numrin e emergjencës 112. Pas aksidentit, dëshmitari tha se ka parë një nga të mbijetuarit të dalë nga automjeti në këmbë.
Mes viktimave është edhe një shqiptar, i identifikuar si Vasil Pilo i cili jetonte prej vitesh me familjen e tij në Alexandria të Imathias, në Greqi.
Ndërkohë, Genci Sadiku, shqiptari tjetër i përfshirë në aksident, ka arritur të komunikojë shkurtimisht me familjen e tij, duke i siguruar se është jashtë rrezikut për jetën.
“Nuk e di si jam gjallë, por jam mirë. Do të kthehem në Shqipëri”, kanë bërë të ditur familjarët e tij për mediat greke. /vizionplus.tv
