Për shkak të rrëshqitjes masive të tokës, juglindja e vendit ishte e izoluar për 11 ditë. Qarkullimi, përmes një segmenti provizor prej 200-300 metrash, i paasfaltuar në vendin e quajtur Arrat e Rrugës, u rikthye më 3 mars. Segmenti provizor, kalon përmes rrugës së vjetër të shembur dhe trasesë ku po punohet për Korridorin 8 dhe do të funksionojë me sinjalistikë kantieri.
Ditën e sotme, 7 mars, kreu i qeverisë Edi Rama inspektoi punimet në këtë aks dhe më pas zhvilloi një takim me banorët e zonës. Ai theksoi se qeveria është e vetëdijshme për vështirësitë që situata e krijuar në segmentin rrugor u ka shkaktuar banorëve të zonës dhe përdoruesve të rrugës. Ai garantoi se punimet për korrigjimin e dëmit do të vijojnë pa ndërprerje deri në zgjidhjen përfundimtare të problemit.
Rama: Ne jemi këtu për t’i garantuar të gjithë që jemi shumë të vetëdijshëm për dëmin që i shkaktohet njerëzve nga ndryshimi i ritmit të jetës, nga pengesat që shkaktohen dhe për të garantuar që puna këtu nuk ndalet në mënyrë që ta bëjmë sa më shpejt korrigjimin e këtij segmenti dhe mbylljen e kësaj plage. Duhet ta bëjmë shpejt, por duhet ta bëjmë mirë. Janë procese që kërkojnë kohën e tyre, nuk mund të bëhen brenda ditës. Do ta bëjmë sa më shpejt, por mirë që kjo plagë të mbyllet përfundimisht./vizionplus.tv
