Ish-kryetari i PD, Sali Berisha ka deklaruar nga Kamza se askush nuk mund të prekë sovranitetin e Partisë Demokratike. Për herë të parë, Berisha shmangu çdo koment për Lulzim Bashën, i cili ndodhet në zi për shkak të humbjes së të atit, por lideri historik i së djathtës paralajmëroi Shtetet e Bashkuara se nuk mund të ndërhyjnë në proceset e brendshme në PD.
“Dhe do t’i themi kujtdo në botë se sovranitetin e kësaj partie nuk mund ta prekë kush, ai sovranitet qëndron në idealet e qindra e mijëra jetëve të sakrifikuar nga diktatura komuniste, burgjeve të shqiptarëve në dikaturë, për besimin te Zoti dhe liria. Nuk mund ta prekë kush sovranitetin, t’i diktojë kësaj partie se kush do të jetë kryetari i saj, përveç votës tuaj. Nuk mund kush të imagjinojë se mund të blejë dhe shesë me viza si Kolombi me pasqyra indianët, demokratët dhe demokratet e Shqipërisë.”
Berisha iu bëri thirrje edhe demokratëve qe ende janë skeptikë të bashkohen në Kuvendin e 11 dhjetorit.
“Ne do vendosim primaret, do jeni ju që përcaktoni e do zgjidhni kryetarin, dhe forumet që do zgjidhni do vendosin për ju.”
Berisha ka përsëritur synimin e tij për t’u rikthyer në krye të PD.
“Unë rikthehem pas 8 vitesh, por nëse më pyet kush nga ndryshoj nga 2013, une mund t’u them i vetmi ndryshim është se fle më pak e punoj më shumë.”
Në Kamëz, në krah të Berishës, ishte drejtuesi politik për Kamzën, Flamur Noka, por sërish mungoi Xhelal Mziu, i cili ka drejtuar Bashkinë e Kamzës për 3 mandate.
