Komisioni për Kulturën dhe Turizmin u përfshi nga debatet për koncertin e reperit amerikan Kanye West në Tiranë.
Gjatë raportimit të Ministrit të Turizmit, Blendi Gonxhja, kryetarja e komisionit, demokratja Ina Zhupa kërkoi llogari për financimin prej 4.3 milionë eurosh nga qeveria për koncertin.
“Keni dhënë 4.3 mln euro për një koncert privat kur kishit premtuar që nuk do të jepnit asnjë lekë. Si e konceptoni ju urgjencën e një koncerti të parashikuar? Urgjencë ishte mos shitja e biletave? Cila ishte nevoja për t’u dhënë këto para? Ku është logjika e urgjenca e një koncerti privat?”, tha Zhupa.
Ministri sqaroi se nëse qeveria nuk do të alokonte fondin, koncerti rrezikonte të mos të zhvillohej. Por ai shtoi se eventi ka sjellë fitime nga shitja e biletave dhe turistët.
“Ishte në rrezik mosorganizimi i eventit për arsye se eventi nuk kishte garantuar ecuri në vetëfinancimin e eventit. Një event nuk financohet vetëm nga biletat, financohet nga një sponsor etj. Ishte e paparashikuar situata. Kemi vënë rekord me 60 mijë spektatorë në një tur global në rajon”, tha ministri.
Debatet vijuan pasi opozita pretendoi se do të jepen para edhe për një koncert të Jennifer Lopez në Tiranë, por kjo është mohuar nga Ministri Gonxhja.
“Do i jepni 4.3 milionë euro edhe asaj?”, tha Zhupa.
“Jo. E kemi refuzuar për momentin se kërkonte 2 milionë euro garanci nëse do të ketë protesta. E kemi refuzuar se nuk ia japim dot 2 milionë euro. Kjo është kostoja e destabilizimit të vendit. Për ata që e duan JLo në Tiranë, ta dinë që nuk e japim dot këtë garanci sepse na është dukur e pamundur për t’ia ofruar”, tha Gonxhja.
Gjatë mbledhjes, Gonxhja u shpreh se 22 mijë turistë të huaj erdhën në Tiranë vetëm për koncertin e zhvilluar në 11 korrik.
