Pas humbjes 1-0 në ndeshjen e parë, Vllaznia reagoi fuqishëm në takimin e kthimit ndaj Daugavpils, duke fituar me rezultatin 2-4 në Letoni dhe duke siguruar kalimin në turin e dytë të UEFA Conference League.
Shkodranët e nisën takimin me vendosmëri dhe kaluan në avantazh në minutën e 22-të me golin e Mensah.
Megjithatë, vendasit nuk qëndruan pasivë: Uilliams barazoi shifrat, ndërsa Diallo përmbysi rezultatin, duke përfunduar pjesën e parë 2-1 për Daugavpils.
Vetëm pak sekonda pas rifillimit, një goditje e bukur me të majtën nga Jago e riktheu Vllazninë në lojë. Skuadra e drejtuar nga Edi Martini shtoi presionin në pjesën e dytë dhe gjeti golin e tretë me Dodaj rreth 15 minuta para fundit.
Kur gjithçka po shkonte drejt kohës shtesë, Esat Mala vulosi fitoren dhe kualifikimin me një gol të rëndësishëm në minutat e fundit, duke i dhënë fund një ndeshjeje dramatike në favor të kuqebluve.
