Koncesionari i Check-Up ka reaguar pas akuzave të kryetares së Komisionit Hetimor Parlamentar për Shëndetësinë, Albana Vokshi.
Përmes një deklarate të shpërndarë për mediat, koncesionari thekson se Vokshi ka hedhur akuza që nuk qëndrojnë. Sipas tyre, deputetja demokrate ka atakuar Check-Up-in për 8 vjet me radhë që koncesioni është në fuqi dhe ofron shërbim në të gjithë territorin e vendit.
Kontrolli Shëndetësor Bazë reagoi ndaj akuzave të bëra nga Kryetarja e Komisionit Hetimor të Koncesioneve të Shëndetësisë, Albana Vokshi, gjatë seancës së fundit të komisionit, duke thënë se shumë të pavërteta janë thënë, duke hedhur baltë mbi punën 8-vjeçare të këtij projekti.
“Fitimet dhe shifrat nuk janë ato për të cilat flet kryetarja e komisionit, por janë shumë më të ulëta nga vlerat e paraqitura atë natë. Shifrat e bilancit të kompanisë, të cilat gjenden lehtësisht në QKB, flasin qartë për të ardhurat e realizuara dhe të paguara nga fillimi i projektit deri në fund të vitit 2023 nga FSDKSH në shumën prej rreth 44 milionë euro.”
Sipas Kontrollit Shëndetësor Bazë Kryerja e këtyre analizave gjatë periudhës 2015-2023 ka gjeneruar një fitim mesatar prej rreth 8.9% në vit, që ka sjellë fillimin e shlyerjes së investimit pas vitit të 8-të nga aksionerët.
“Për të qenë më të qartë, me shifrat e deklaruara në atë komision, deri në fund të afatit 10-vjeçar, parashikohet që vlera e projektit të shkojë në 63 milionë euro dhe jo 130 milionë euro. Deri më sot, mbi 1.1 milionë njerëz na kanë besuar dhe kanë marrë pjesë në Kontrollin Shëndetësor Bazë, duke u paraqitur për vite me radhë.”
Sipas Kontrollit Shëndetësor Bazë sot Shqipqria ka një sistem shëndetësor nga i cili mund të përfitojnë të gjithë shqiptarët, pasi funksionon në 436 qendra shëndetësore nga veriu në jug.
Nga fillimi i projektit deri më sot janë diagnostikuar rreth mbi 11,600 raste alerte me vlera kritike, tregues të situatave që mund të rrezikojnë jetën e individit.
Kompania është shprehur gjithashtu se do të ndërmerren të gjitha veprimet e nevojshme për të ndjekur gjyqësisht deklaratat e pavërteta të Vokshit, të cilat kanë dëmtuar rëndë imazhin e shoqërisë dhe të projektit./vizionplus.tv
