Fajin për përmbytjen e Durrësit nga reshjet e sotme ish-deputeti i PD, Oerd Bylykbashi e gjen tek bashkia.
Përmes një postimi në “Facebook”, ai deklaroi se nëse milionat e hedhura do të shkonin për të ribërë kanalizimet në Durrës, atëherë nuk do të ndodhte kjo gjë sa herë që bie shi.
“Rrebeshi i maskarallëkut. Durrësi u përmbyt sërish. U përmbyt jo nga shiu, por nga maskarallëku. Kush do të japë llogari për milionat e hedhura për betonimin e Velierës, por jo për të ribërë kanalizimet e Durrësit? Durrësi nuk ka kryetar bashkie të zgjedhur, por të emëruar me dhunë. Paratë vidhen në mënyrë anonime sepse askush nuk jep llogari me votë, por durrsakët vazhdojnë të përmbyten edhe me shi vere.”
Sa i përket debatit për Teatrin Kombëtar, demokrati tha se e njëjta gjë ndodhi edhe para tre vjetësh në Durrës.
“Maskarallëkun e kësaj qeverie me shembjen e teatrit, durrsakët e përjetuan para tre vitesh kur u shkatërrua arkeologjia pranë Torrës Veneciane dhe kur Torra u kthye në një hiç në cep të monstrës prej betoni. Propaganda e qeverisë e zvogëloi atëherë rëndësinë historike të rrënojave mijëravjeçare në emër të betonit modern. Siç ndodhi me Teatrin këto ditë. Atëherë ishte Dako, sot është Veliaj. Të dy me hyqmin e Ramës shkatërruan trashëgiminë kulturore në emër të babëzisë kriminale. Sa kambana duhen për të dëgjuar? Shumë kambana të bëjnë shurdh!”
Kryqëzimi pranë stadiumit Niko Dovana dhe disa rrugë të tjera të qytetit u përmbytën si pasojë e reshjeve të dendura të shiut sot.
Shkak u bë bllokimi i pusetave ndërsa u shkaktuan vështirësi të shumta në lëvizjen e automjeteve dhe të qytetarëve.
