Presidentja e Komisionit Evropian, Ursula von der Leyen, bëri të ditur sot se, ndonëse Bashkimi Evropian sapo ka miratuar paketën e 17-të të sanksioneve kundër Rusisë, tashmë është në përgatitje një paketë e 18-të, e cila pritet të përfshijë masa edhe më të ashpra ndaj Moskës.
“Në këtë moment, është e domosdoshme të rrisim presionin ndaj Rusisë për të arritur një armëpushim,” deklaroi ajo përmes një postimi në platformën X, pas një bisede telefonike me presidentin ukrainas Volodymyr Zelensky.
Ndërkohë, Ministri i Jashtëm gjerman, Johann Vandevoll, theksoi se Shtetet e Bashkuara janë të gatshme të shqyrtojnë vendosjen e sanksioneve shtesë ndaj Rusisë. Ai vuri në dukje se, për aq kohë sa presidenti rus Vladimir Putin nuk tregon vullnet për negociata serioze, vendet evropiane janë të përgatitura të përshkallëzojnë më tej masat ndëshkuese.
Just off the phone with @ZelenskyyUa.
We are coordinating closely on the next steps.
Europe has just adopted its 17th package of hard-biting sanctions.
An 18th package is being prepared with further hard hitting sanctions.
It’s time to intensify the pressure on Russia to…
— Ursula von der Leyen (@vonderleyen) May 20, 2025
Duke folur nga Brukseli, gjatë një takimi me homologët e tij të Bashkimit Evropian, Vandevoll shprehu zhgënjimin e Perëndimit me qëndrimin e pandryshuar të Moskës. “Është tejet zhgënjyese të shohësh se Rusia nuk ka ndërmarrë asnjë hap drejt paqes. Na duhet të reagojmë,” tha ai, duke iu referuar mungesës së një armëpushimi të menjëhershëm dhe pa kushte nga ana e Kremlinit.
Zyrtari gjerman nënvizoi gjithashtu pritjet e qarta nga ana e Uashingtonit: “E kemi bërë të ditur vazhdimisht se ajo që presim nga Rusia është një armëpushim i menjëhershëm dhe pa kushte. Po ashtu, presim që aleatët tanë amerikanë të mos e tolerojnë mungesën e këtij angazhimi nga Moska.”
