Aranita Brahaj drejtuese e “Open Data Albania” thotë se ndryshimet e fundit në Kod nuk mund të konsiderohen reformë përsa kohë nuk pati frymë bashkëpunuese. Sipas saj, partia në pushtet nuk u angazhua të krijojë një klimë pozitive diskutimi qoftë me opozitën në parlament dhe atë jashtë parlamentit, por edhe me ekspërtet.
Sipas saj, këto ndryshime të kryera pa konsultime dhe në fshehtësi ka gjasa të jenë kalkulime për të favorizuar PS për të shkuar drejt mandatit të tretë.
Brahaj thekson mes të tjerash se ulja e pragut deri në 1% është precedent i rrezikshëm që krijon premisa për t’i dhënë dorë individëve të “fortë”që të futen në parlament, pse jo edhe subjekteve politike me karakter nacionalist.
“Këto ndryshime erdhën nga zyrat e partisë në pushtet. Si i tillë, ky kod ka gjasa të sjellë defekte shumë të mëdha sidomos në 25 prill. Risku është shumë i lartë që partitë që janë në pushtet të kenë kalkuluar edhe risqet e tyre për të marrë një mandat të tretë. Riksu për të patur parti që vijnë të fuqizuara nga grupe biznesi apo nga grupe kriminale, risku që ka të bëjë me parti të vogla të krijuara nga grupe me teza nacionaliste.”
Më tej Brahaj shtoi se është e vështirë të llogarisësh shpenzimet financiare për zgjedhjet në Shqipëri, përsa kohe ka shumë para të pista që qarkullojnë gjatë procesit.
“Nuk mund të themi sa është fatura e një fushate zgjedhore sepse duhet të kalkulojmë dy procese, atë që partitë deklarojnë dhe atë që nuk deklarojnë. Janë dy lloje parash, ato informale që janë shpenzuar dhe nuk janë deklaruar. Janë para që përdoren për kriminalitetin zgjedhor, për blerjen e votës.”
