Mbështetja me fonde për fermerët jo vetëm që po vonohet, por është e pamjaftueshme, sipas deputetit socialist Erion Braçe.
Në një interpelenacë të kërkuar me ministren e Bujqësisë, Braçe u shpreh i shqetësuar që jo të gjithë bujqit dhe blegtorët aplikues në Skemën Kombëtare do të mund të përfitojnë, prandaj kërkoi më shumë para për ta.
ERION BRAÇE
DEPUTET I PS
“Skema po mbytet. Pamjaftueshmëri parash dhe mendoja se sot këtu do të kërkonit para më shumë dhe dyta, skema është e ngadaltë, burokratike, jashtë cikleve të prodhimit dhe nevojës së bujqve. Çfarë bëjnë këta njerëz që 22 ditë rresht për naftën nuk kanë miratuar asnjë aplikim, zero? Për ditë, kanë miratuar 8 mijë aplikime njëherësh. Jemi në korrik, gruri iku, u korr me çmimin 2600 lekë. Misri të mos na dështojë. Si e justifikojnë rrogën këta. Nuk ka para mjaftueshëm, kur unë paraqes bagëtitë dhe lop\ët, duhet të më paguash. Nevoja që vjen këtu është për më shumë para. Duhet të plotësoni të paktën këta njerëz që kanë besuar te kriteret që keni vendosur ju, edhe pse janë përjashtuese, por të paktën paguani këta që kanë aplikuar dhe ju kanë besuar. Ndryshimet në buxhet që qeveria ka lajmëruar duhet të mbulojë nevojën për para për të gjithë ata që kanë aplikuar sepse janë njerëz në nevojë ata.”
Në kundërpërgjigje, ministrja tha se për këtë vit, mbështetja me fonde për bujqësinë ka qenë më e larta ndonjëherë.
FRIDA KRIFCA
MINISTRE E BUJQESISE
“Për eficencën ë procedurave të ndjekura nga institucionet, Skema Kombëtare deri tani me 30 mijë përfitues, nuk ka ndodhur kurrë as vjet, as parvjet që të kemi pasur në skemën 30 mijë përfitues në 7 korrik. Skema përthithet deri në 95% në fund të vitit. Duhet më shumë buxhet për të plotësuar të gjithë kërkesën, por këtë vit kemi vënë buxhetin më të lartë në dispozicion. Ka disa kritere përjashtuese, kur fermerët duhet të plotësojnë faturat dhe t’i sjellin.”
Erion Braçe u ndal edhe te çmimet e ulëta me të cilat prodhimi vendas shitet, duke akuzuar pikat e grumbullimit për abuzim. Por ministrja Krifca tha se nuk është detyrë e qeverisë të ndërhyjë te çmimet.
