Bordi i transparencës për çmimin e naftës, për kryetarin e Partisë Demokratike Sali Berisha, nuk e lehtëson barrën ekonomike të qytetarëve.
“Shkelmim i plotë i interesit të qytetarëve. Ky bordi i transparencës vjen vetëm për interesin e qeveritarëve. Ti vendosin taksat aq sa Kosova, Maqedonia e Veriut apo Mali i Zi. Kjo do të ishte zgjidhje”, tha Berisha.
Kryedemokrati vijoi akuzat për çështjen Balluku, duke pretenduar se parlamenti dhe SPAK kontrollohen nga kryeministri Edi Rama.
“Ajo çka dua të them, nuk kam patur kurrë dyshim se, SPAK është në kontroll të plotë të Edi Ramës. Këtë nuk kam dyshuar”, shtoi Berisha.
Më tej, Berisha u shpreh se është kërcënuar edhe prokurori i çështjes.
“Tani, ky prokuror zbatoi ligjin, u kërcënua, ky prokuror është kërcënuar në mënyrën më të egër. Është kërcënuar nga vrasës të dërguar nga Lubi Balluku dhe Edi Rama. Është kërcënuar nga Edi Rama vetë, është kërcënuar nga të gjitha anët. Ky prokuror nuk është tërhequr, i ka qëndruar deri në fund ligjit, siç duhet ti qëndrojë”, tha Berisha.
Kreu demokrat lajmëroi mbajtjen e një tjetër proteste kombëtare, por pa treguar datën e saj.
