Parlamenti u mblodh në një seancë jashtë radhe për të votuar për anëtarësimin e Shqipërisë në Bordin e Paqes për Gazën, një ftesë që iu bë kryeministrit Edi Rama nga Presidenti i SHBA-ve, Donald Trump.
Gjatë seancës, pati përplasje mes Partisë Socialiste dhe asaj Demokratike për respektimin e rregullores për të thirrur seancë të jashtëzakonshme.
“Kuvendi me kërkesë të Këshillit të Ministrave ose 1/5 së deputetëve mund të miratojë një projektligj me procedurë të përshpejtuar, por jo më parë se një javë nisja e procedurës së shqyrtimit. Patjetër që jemi pro anëtarësimit të Shqipërisë në Bordin e Paqes për Gazën, por duhet ta bëjmë sipas rregullores së Kuvendit. E bëjmë efektive brenda një jave, por juve ju duhet me nxitim sepse duhet të zhurmoni për këtë zonjën këtu. Si do e justifikoni ju shkeljen e procedurës. Që i njoftoni deputetët në orën 9 të darkës dhe ne vijmë ta votojmë të nesërmen në mëngjes, një projektligj kaq të rëndësishëm”, tha kreu i grupit parlamentar të PD, gazment Bardhi.
“Kam përpara një kërkesë, të firmosur nga deputeti që sapo foli, i cili për këtë shkeljen që kemi sjellë ne, ka propozuar amendamente. Ndryshe themi, ndryshe bëjmë. Çfarë të bëjmë ne të shkretët, çfarë na ka gjetur ne me ju. Sa i përket kësaj kërkesës, padyshim që në komisionin e jashtëm do të shqyrtohen, pra e kemi tejkaluar fazën e procedurës sepse na kanë ardhur amendamente. Kështu që këtë teatrin me këto deklaratat, se gjoja na ke gjetur zgjidhje procedurale, e para që ta dish kur bëhet fjalë për angazhim ndërkombëtar dhe pjesëmarrje në organizata ndërkombëtare”, tha kreu i grupit palramentar të PS-së, Taulant Balla.
Pas diskutimeve, Parlamenti votoi për kalimin me procedurë të përshpejtuar të projektligjit. I njëjti draft kaloi për votim edhe në Komisionin e Jashtëm, ndërsa Parlamenti mblidhet sërish gjatë ditës për të miratuar marrëveshjen.
