Kryeministri Edi Rama ndodhet në njësinë 2 në Tiranë, ku po flet për buxhetin 2026.
Ai u ndal tek pensionistët, duke thënë se mbështetja ekstra për pensionet do të shkojë në shifrën 1.7 miliardë euro.
Ndërkohë shtoi se bonusi i fundvitit do të fillojë shpërndarjen që nga fillimi i muajit dhjetor.
Sa i përket rritjes së pensioneve, kreu i qeverisë deklaroi se rritja e çdo janari që vjen do të jetë dyfishi i vitit paraardhës.
Rama: Më në fund kemi arritur atë që kemi dashur të bëjmë prej kohësh, rritjen e mbështetësve për pensionistët që faktikisht do të zënë pjesën kryesore në financimin e shtetit në këtë mandat të katërt. Mbështetja ekstra për pensionet do të shkojë në shifrën 1.7 miliardë euro, të cilat janë të ndara në 4 vite, të përcaktuara në buxhetin afatmesëm të qeverisë. Ky moment është një moment që e përmbush atë që ka qenë ambicia jonë kryesore, rritja e vazhdueshme ekonomike, të jetë një rritje që përjetojnë të gjithë. Sot edhe pensionistët përfshihen në këtë ambicie dhe konkretisht do të prekin këtë rritje të vazhdueshme, një fakt që edhe mua më lehtëson. Shumë herë jam gjetur përpara detyrimeve ku thoja na duhet pak më shumë kohë. Për ta bërë të qartë, bonus i fundvitit do të jepet ekzaktësisht siç është dhënë edhe vitin e shkuar, duke filluar që nga fillimi i muajit dhjetor. Ndërkohë që vitin e ardhshëm do të fillojmë nga janari që të rrisim mbështetjen për pensionistët. Dhe rritja e çdo janari që vjen do të jetë dyfishi i vitit paraardhës.
/vizionplus.tv
