Një mjet tip BMW me targa të vjedhura u qëllua ditën e sotme në aksin Elbasan-Peqin, në vendin e quajtur Kryqëzimi i Cërrikut.
20 plumba automatiku janë lëshuar në drejtim të makinës nga një mjet tjetër në lëvizje. Objektivi po lëvizte në drejtimin nga Elbasani për në Peqin. Mjeti ka vazhduar rrugën edhe për rreth 100 m dhe ka ndaluar me pranë një lokali të braktisur.
Autorët që kanë qenë brenda mjetit e kanë braktisur atë dhe janë larguar me shpejtësi nga vendi i ngjarjes.
Forca të shumta policie u nisën drejt fshatit Papër dhe kur kanë shkuar në vendngjarje kanë gjetur vetëm mjetin e shpuar disa herë nga plumbat dhe me gomat e shfryra. Edhe drejtori i policisë Ardjan Çipa ishte prezent në vendngjarje. Menjëherë ka nisur puna për identifikimin dhe kapjen e autorëve.
Nga verifikimet e kryera rezulton se targa e mjetit tip BMW ka qenë e vjedhur në Durrës në prill të 2021. Nga kontrolli brenda mjetit u gjet një bidon të mbushur me 5 litra benzinë.
Ende mbeten mister rrethanat e kësaj ngjarje. Targat e vjedhura dhe benzina brenda mjetit kanë bërë që hetuesit të dyshojnë se ka qenë pikërisht ky mjet dhe personat brenda tij që mund të jenë nisur për atentat dhe ndoshta plani nuk ka funksionuar pasi janë pikasur nga grupi tjetër.
