Shoqata e Biznesit të Vogël dhe të Mesëm ka paralajmëruar se do të mbajë një protestë të dielën në mesditë, duke ulur qepenat për një orë.
Kryetari i kësaj shoqate, Albert Nasto, i ftuar në studion e lajmeve në “Vizion Plus”, deklaroi se arsyeja kryesore e protestës është ligji i fiskalizimit.
Ai kërkoi nga qeveria që ky proces të shtyhet në kohë, deri në rimëkëmbjen e biznesit. Pas krizës së pandemisë, Nasto theksoi se aktiviteti ekonomik nuk mund t’i përballojë kostot shtesë.
“Ne nuk kundërshtojmë procesin, por kushtet në të cilat ndodhemi. Me grevën që do të fillojmë, kërkojmë që qeveria shqiptare të marrë disa fakte konkrete parasysh. Është një kosto e madhe financiare e papërballueshme nga biznesi i vogël dhe i mesëm; jemi nën efektet e pandemisë globale. Nuk jemi në lartësinë arsimore për të punuar këtë lloj procesi, që quhet fiskalizim, i cili është proces i ndërlikuar. Ne jemi në kufijtë e mbijetesës, po punojmë me 30 deri në 40 për qind të kapacitetit. Është e tepërt dhe e dëmshme financiarisht. Mundësia për të marrë një punonjës tjetër është zero për ne. Është një proces i sofistikuar që biznesi i vogël dhe i mesëm i Shqipërisë nuk do ta ketë shansin që ta aplikojë. Kostoja vjetore kalon në 1300 euro për biznesin e vogël. Janë 9 elementë që duhen blerë…Ne kërkojmë nga ana e Kryeministrit, ministrit të Financave, por edhe Parlamentit, një shtyrje të afatit të procesit të fiskalizimit, sepse jemi akoma në pandemi; ekonomia shqiptare nuk e ka marrë veten. Dhe një afat të pacaktuar, derisa biznesi shqiptar të dalë nga pandemia dhe të rimëkëmbet. Jemi më pak të ndihmuarit në rajon dhe Evropë…”
