Vendimi për të tarifuar me 10 % eksportet shqiptare drejt tregut amerikan ka sjellë reagimin e bizneseve eksportuese.
Filip Gjoka, përfaqësues i Shoqatës së Bimëve Medicinale, produkti që eksportohet më shumë, thotë se kjo kosto shtesë nuk do të transferohet tek fermeri, por do të ndahet mes shitësit dhe blerësit amerikan.
“Kemi rënë dakord me një pjesë të partnerëve tanë në SHBA që kjo kosto shtesë, çka do ti bëjë produktet tona më pak të konkurueshme do të ndahet mes shitësit dhe blerësit. Dua t’i informoj grumbulluesit si dhe fermerët që janë në prag të sezonit, që këto kosto nuk do të rëndojnë tek ata, ndaj të vijojnë punën dhe të mos dekurajohen”, tha Filip Gjoka.
Por, kreu i Shoqatës së Bimëve Medicinale ka një apel për qeverinë, e cila duhet të mbështesë këtë industri e cila mban dhe peshën më të madhe të eksporteve shqiptare.
“Ribursim i menjëhershëm i 10% TVSH për të gjithë fermerët në sektor. Kompensim i zhvlerësimit të euro/dollarit përmes një kursi të stabilizuar fiks, siç bëjnë Serbia dhe Maqedonia. Zbritje tatimore për kompanitë eksportuese që përdorin standarde cilësore të larta. Heqje e tatimit mbi pagat deri në 80,000 lekë për punonjësit sezonalë. Qeveria të paguajë kontributet e sigurimeve shoqërore për 5 muaj gjatë sezonit të grumbullimit”, tha Gjoka gjatë një konferencë për shtyp.
Mungesa e fuqisë punëtore, shpopullimi i fshatit, zhvlerësimi i dollarit janë disa nga sfidat që përballet ky sektor.
Ndërkohë tarifa 10% për eksportet drejt tregut amerikan rrezikon ti bëjë produktet shqiptare më pak të kërkuara. Ndaj dhe efekti i kësaj tarife është se kush do ta paguajë atë, fermeri apo bizneset do të ulin fitimet e tyre?
/vizionplus.tv
