Carlitos Alcaraz është “mbreti” i ri i Wimbledon. Djaloshi spanjoll mundi pas gati 5 orësh lojë, legjendën e tenisit botëror Novak Djokoviç, i cili ishte edhe fitues ne fuqi i këtij grand slami!
Finale epike në Londër, nivel shumë i lartë dhe tenis spektakolar që ka dëfryer ata që e kanë parë nga afër, familjen mbretërore angleze, mbretin e Spanjës Fillip, yje të kinematografisë botërore, si dhe qindra milionë njerëz, që e ndoqën në media.
20-vjeçari spanjoll fitoi 3 me 2 në 5 sete, duke nisur mbretërimin në një turne, i cili ishte fituar 7 herë në karrierë nga Djokoviç. Serbi e nisi shumë mirë edhe këtë finale, duke fituar setin e parë 6 me 1. Mirëpo kthesa e Alcaraz ishte e madhe.
Talenti iberik fitoi dy setet e tjera fillimisht 7-6 dhe pastaj 6-1 duke përmbysur gjithçka ne favorin e vet.
Por kampioni serb Djokoviç nuk u dorëzua dhe qëndroi në lojë, duke fituar setin e katërt 6 me 3. Seti i pestë dhe i fundit ishte shumë emocionues.
Falë një freskie fizike të admirueshme, shërbimeve të forta dhe gjakftohtësisë epike, Alcaraz fitoi 6 me 4 duke rrëmbyer “zemrat” e te pranishmeve në këtë finale të Wimbledon, një prej turneve më prestigjioz të tenisit botëror.
Ky është grand slami i dytë në karrierë për djaloshin spanjoll, i cili për më tepër kishte luajtur vetëm 4 turne më herët në fushat me bar, aty ku nuk shihej kurrsesi favorit, çka e bën edhe më spektakolare suksesin e tij.
Nga ana tjetër, Xhokoviç nuk arriti të barazojë rekordin e jashtëzakonshëm të Roxher Federer, që ka fituar 8 herë në Wimbledon.
Natyrisht serbi ka kohë të provojë sërish barazimin e rekordit edhe pse suksesi i Alcaraz paralajmëron nisjen e një tjetër epoke në tenis.
