Edhe për Bankën Evropiane për Rindërtim dhe Zhvillim një nga sfidat që duhet të marrë vëmendjen e qeverisë është emigracioni. Gjatë prezantimit të raportit të tranzicionit, BERZH apeloi për më shumë investime në kapital njerëzor me qëllim që jo vetëm të frenohet emigracioni, por edhe të kthehen të larguarit.
“Emigracioni nuk është një sfidë vetëm për Shqipërinë, por edhe për vende të tjera të tilla si Bullgaria dhe Rumania. Mendoj se duhet të vazhdoni të trajnoni njerëzit që keni. Nëse keni njerëz që largohen në një kohë të shkurtër, ju duhet të investoni edhe më shumë për trajnimin dhe aftësitë e tyre. Më pas, duhet të krijoni edhe një mjedis të përshtatshëm që disa nga këta njerëz të kthehen, për të sjellë eksperiencën e tyre”, shprehet Alexander Plekhanov, drejtor i BERZH për Impaktin në Tranzicion.
Në raport BERZH evidenton se një nga treguesit që nuk po përmirësohet është qeverisja e vendit, e cila në raport me 2022, gjatë vitit të shkuar ka pësuar rënie.
Ky tregues është i përkeqësuar edhe në vendet e tjera të rajonit, me përjashtim të Malit të Zi dhe Maqedonisë së Veriut.
“Gjatë vitit të kaluar ekonomitë rajonale kanë bërë përmirësime modeste në fushën e konkurrencës. Por në të njëjtën kohë, rezultatet për qeverisjen kanë rënë. Zhvillimet në fushën e qeverisjes kanë qenë të përziera, për shembull, pjesëmarrja në shërbimet elektronike është përmirësuar, por nga ana tjetër, treguesi që mat efektivitetin e gjykatave dhe luftën ndaj informalitetit ka rënë gradualisht”, thotë BERZH.
Po ashtu, në raport evidentohet se kënaqësia e njerëzve për të jetuar në Shqipëri nuk ka ndryshuar që prej 2016, ndryshe nga vendet e Evropës Juglindore dhe Ballkanit Perëndimor që ky tregues është rritur, duke reflektuar përmirësimin e të ardhurave. /vizionplus.tv
