“Berishizmi” në PD? Rrëfehet Harxhi: Ja pikat ku ndahem!

Doktrina e Berishës në Partinë Demokratike ndërthuret me idealet e ’90-ës, por megjithatë, Edith Harxhi shprehet se ka diferenca të mëdha me platformën e saj.

E ftuar në Spotlight nga Alban Dudushi, në Vizion Plus, kandidatja për kryetare e Partisë Demokratike, Edith Harxhi tregoi se çfarë e bashkon dhe çfarë e ndan me ‘Berishizmin’ në PD.

“’Berishizmi’ është i lidhur shumë ngushtë me parimet fillestare të Partisë Demokratike, sepse z.Berisha ka qenë një ndër pesë ata që morën pjesë në natën e themelimin e Partisë Demokratike dhe natyrisht është lider historik i saj. Kështu që, ndërthuret doktrina e z.Berisha me idealet e ’90-ës. Por, natyrisht idealet e ’90-ës janë antikomunizmi, çështje të tjera të lirisë së individit, pronës, familjes. Ka elemente të forta, por natyrisht ka edhe lëvizje të forta sepse doktrina e z.Berisha në ato 20 e ca vite qeverisje ka qenë ajo që ka variuar nga e djathta në një qendër të djathtë. Por, edhe në pjesën e parë të tij, në vitet e para të qeverisjes kanë qenë ato deklaratat e tij bashkëfajtor dhe bashkëvuajtës me të cilat unë nuk bie dakord në asnjë mënyrë. Ka diferenca, siç është diferenca e madhe që unë e kam shprehur kudo këto ditë, përsa i përket çështjes së trajtimit të një lëvizje antikomuniste në Shqipëri, e cila është zbehur krejtësisht nga Partia Demokratike, si dhe një platformë tjetër për çështjen e trajtimit të pronës. Unë jam kundër 7501-it. Kam qenë kundër gjithmonë dhe mendoj se është një nga gabimet tona më të mëdha.”