Kryetari i Partisë Demokratike Sali Berisha pretendoi se kryeministri Edi Rama nuk do të marrë pjesë në konferencën e sigurisë në Mynih pasi i janë anuluar takimet.
Në një komunikim me gazetarët Berisha akuzoi kryeministrin Rama se tashmë është i izoluar nga partnerët ndërkombëtarët, duke ironizuar takimin e tij me ish-deputetin demokrat Dashnor Sula.
“Ekziston shprehja popullore, puthu me Milon, por sot kjo është, puthu me Dashin. Edi Rama sot që kishte prenotuar hotele, salltanete dhe bëhej gati komunikata të parafabrikuara të na dërgonte nga konferenca më e rëndësishme vjetore e sigurisë në botë, që është Konferenca e Mynihut, nuk shkoi dot. Ai dhe ekipi i tij nuk u nis dot për Mynih, e anuloi”, tha Berisha.
Sipas Berishës, kryeministri Rama po përballet me ndëshkim diplomatik.
“Për t’i vënë kapak damkosjes së njeriut që përdor mandatet e krimit për të mbrojtur krimin dhe korrupsionin, vjedhjet e tij, për t’i vënë kapak ndëshkimit diplomatik dhe politik të hajdutit që përdor Lubinë si parzmore për mbrojtjen e vet, është kjo e pashembullta në historinë e Konferencës së Sigurisë në Mynih ku marrin pjesë ndër më të rëndësishmit të sigurisë në Europë dhe në botë. Pra, natyrisht ju nuk mund të keni njoftim zyrtar nga Edi Rama, por unë u them se ekipi i dërguar mbeti i tromaksur, ndërsa në tavolinën gabimisht protokolli kishte vendosur edhe emrin e Edi Ramës, se do ishte. Por dikush u kujtua dhe shkoi dhe e hoqi dhe atë, dhe Edi Rama nuk shkon dot në Mynih.”, shtoi kreu i PD.
Berisha përsëriti se opozita do të vazhdojë protestat kundër qeverisë “Rama”.
“Ata, të cilët sulmojnë Sali Berishën se po njollos, sipas tyre Shqipërinë, u them puthuni me Dash Sulën, se Sali Berisha po mbron interesat e çdo shqiptari të ndershëm.”, u shpreh Berisha./vizionplus.tv
