Për herë të parë pas humbjes së zgjedhjeve të 11 majit, Partia Demokratike mblodhi forumet për të vendosur rrugën ku do të ecë PD në mandatin e katërt në opozitë.
Në fillim të mbledhjes së kryesisë, kryetari i PD, Sali Berisha, deklaroi se opozita nuk do ta njohë asnjëherë rezultatin e zgjedhjeve parlamentare.
“Unë ftoj kryesinë që të mos njohim këto zgjedhje. Njohja e këtyre zgjedhjeve do e bënte PD-në bashkëautore në një farsë, më e shëmtuara në 32 vite.”, tha Kryetari i PD, Berisha.
Por, pavarësisht kësaj, Berisha theksoi se opozita do të shkojë të premten në Parlament dhe do të shfrytëzojë sallën e Kuvendit për të denoncuar problemet në zgjedhje.
“Ua them ju personalisht, unë mendoj se në këtë diktaturë, ne nuk duhet të lëmë asnjë hapësirë bosh nga e cila të mos luftojmë kundër saj.”
Beteja e parë e opozitës në Parlament do të jetë hetimi për zgjedhjet e 11 majit.
“Ndaj dhe Parlamentin do ta hapim prapë me komision hetimor për zgjedhjet. Po. Themelore, fjala e lirë, vota e lirë.”
I gjithë fokusi i liderit të opozitës në fjalën para kryesisë ishte denoncimi i zgjedhjeve. Vetëm në një moment, Berisha foli për përgjegjësinë e vetë PD në këtë garë elektorale.
“Secili mund të shohë veten dhe të thotë se unë kam bërë sa kam mundur. Jo, as unë nuk kam bërë sa kam mundur, asnjëri nuk kemi bërë sa mundemi. Tani kërkohet një ribrendim, kërkohet një ndryshim para këtij mali të farsës elektorale, beteja jonë kërkon energji të reja, kërkon forca të reja, kërkon forma të reja.”
Në kryesi, për herë të parë munguan deputetët të cilët nuk fituan në zgjedhjet e 11 majit dhe që ishin pjesë e këtij forumi për shkak të posteve që kishin në Parlament.
/vizionplus.tv
