Kreu i Partisë Demokratike, Sali Berisha, gjatë fjalës së tij në Kuvend ka komentuar protestën e opozitës, e cila u mbajt para Kryeministrisë më 10 shkurt. Lidhur me protestën e radhës, që pritet të zhvillohet më 20 shkurt, Berisha deklaroi se kjo datë do të shënojë “fundin e tiranisë”.
“Edi Rama është i dënuar nga shqiptarët. 10 shkurti e dëshmoi. 20 shkurti do të jetë fundi juaj. 20 shkurti është dita kur shqiptarët përmbysin tiraninë. Ftoj qytetarët shqiptarë t’ua hedhin në Lanë këto imunitete hajdutëve dhe bashkë me to edhe vetë hajdutët”, u shpreh Berisha.
Më 10 shkurt, për më shumë se tre orë, opozita protestoi para Kryeministrisë.
Në përfundim të fjalës së Sali Berishës, disa protestues hodhën molotov në drejtim të godinës së qeverisë.
Si pasojë e përplasjeve, 19 efektivë policie mbetën të lënduar. Gjithashtu, deputeti demokrat Bledion Nallbati mori lëndime dhe u dërgua për mjekim në Spitalin e Traumës.
Opozita kërkon dorëheqjen e kryeministrit Edi Rama dhe krijimin e një qeverie teknike, e cila do t’i hapte rrugë zgjedhjeve të parakohshme.
