Ish-kryeministri Sali Berisha e ka cilësuar arsimin në vend si viktimë të kleptokracisë. Gjatë fjalës së tij në tryezën për të ardhmen e arsimit përmes teknologjisë dhe informacionit, Berisha akuzoi autoritetet se kanë korruptuar hallkat se sistemit arsimor në Shqipëri.
Berisha theksoi se rrogat e pedagogëve janë të ulëta, duke thënë se një pedagog paguhet tre herë më pak se shoferi i Fondit Shqiptar të Zhvillimit.
“Arsimi është viktimë e kleptokracisë dhe në rrafshin psikologjik, jam përpjekur dhe përpiqem të analizoj qëndrimin e këtyre qeveritarëve ndaj qytetarëve, ndaj arsimit, ndaj shëndetësisë.
Është tipik qëndrimi i atij që vjedh dhe përçmon viktimën.
Në Shqipëri, një pedagog universiteti paguhet tre herë më pak se shoferi i Fondit Shqiptar të Zhvillimit. Një pedagog paguhet më keq se në diktaturën hoxhiste.
Bllokoi doktoraturat në një akt prej injorantësh, ua la universiteteve private se ndante me ta taksat që u viheshin doktorantëve”, tha ai.
Ish-kryeministri akuzoi qeverinë se ka përdorur çdo formë për të shndërruar arsimin në socialist.
“Katastrofë është gjendja në arsimin parauniversitar. Është partizuar tërësisht, janë përdorur të gjitha format për ta shndërruar në arsim socialist.
Portali është një kurth, një mashtrim. Profesioni i mësuesit nuk pëlqehet më. Besoj se e dëgjuat, në programet e shpallura për mësues aplikuan vetëm dy maturantë.
Faktori demografik është një tjetër faktor shkatërrues për arsimin tonë. Këtë vit Mirdita kishte vetëm 100 nxënës në klasat e para.
Investimet janë bllokuar totalisht në zonat rurale, çka do të thotë largim, shpopullim”, shtoi ai.
Berisha iu bëri thirrje qytetarëve që të mos reshtin së kërkuari të drejtën e tyre dhe të mos lejojnë shkatërrimin e arsimit në vend.
