Prokuroria e Posaçme Antikorrupsion deklaron se ndaj deputetit socialist Pandeli Majko nuk ka asnjë material kallëzues apo procedim penal.
“Pas verifikimeve të kryera në Regjistrin e Kallëzimeve Penale dhe Regjistrin e Protokollit në Prokurorinë e Posaçme kundër Korrupsionit dhe Krimit të Organizuar nuk rezulton asnjë material kallëzues apo procedim penal në ngarkim të shtetasit Pandeli Majko”, thuhet në reagimin zyrtar të SPAK.
Ndërkohë, më 06 janar, kryetari i PD-së deklaroi se deputeti i Partisë Socialiste ka rënë në përgjimet e SHISH.
Deputeti socialist i ka dërguar shkresë zyrtare Shërbimit Informativ dy ditë më pas (8 janar), duke i kërkuar që t’i vendosin në dispozicion çdo informacion lidhur me akuzat e Sali Berishës, teksa shton se si deputet ka të drejtë të kërkojë shpjegime për çdo çështje që ka të bëjë me përmbushjen e detyrës së tij.
“Në referencë të akuzave publike të deputetit z. Sali Berisha, në konferencën e tij për shtyp të datës 06.01.2025, ndërmjet të tjerash ai pretendonte se në bazë të një informacioni të SHISH, Unë Pandeli Majko jam vënë në përgjim nga institucioni Juaj”, shkruhej në shkresën e tij.
