Zv/ministrja e Turizmit, Vilma Bello, në një intervistë për Vizion Plus foli për të dhënat befasuese që vijnë nga ky sektor, si dhe pritshmëritë e sfidat për sezonin e ardhshëm turistik.
Shqipëria ka një ambicie që të ketë turizëm në çdo ditë të vitit, si do realizohet kjo?
“Kjo është një sfidë e të gjithëve, ashtu siç edhe kryeministri e tha, atë që Shqipëria dëshiron të ketë, jo vetëm për atë që ofron, por edhe sepse do të donim shumë që këtë fjalën sezon të mos e përdorim më, por të flisnim për një Shqipëri të një turizmi gjithë vjetor”, thotë ajo duke nënvizuar se arritja e një turizmi të qëndrueshëm do e çojë vendin drejt këtij synimi.
Sezonin që lamë pas, hasëm një problem me njësitë akomoduese, si do zgjidhet në sezonin tjetër?
“Kjo është një problematikë e ngritur”, pohon ajo, por shton se turiztët megjithatë janë akomoduar në bujtina apo apartamente. “Është një sfidë që rritje e hapësirave akomoduese jo thjeshtë për numrin, se sa do të thoja për rritjen e cilësisë së shërbimit në këto hapësira. Ndoshta kemi nevojë për hapësira më të mëdha në struktura akomoduese me kapacitete më të mëdha, me më shumë shtretër apo me të gjitha kushtet dhe standardet që një strukturë duhet të ketë”, tha ajo.
Transporti publik ishte një tjetër problematikë, si do zgjidhet?
“Ka pasur një nismë shumë të mirë, e cila ka nisur nga E-transport, Drejtoria e Përgjithshme Transportit Rrugor Shqiptar, për të mund të realizuar një formë të veçantë të digjitalizuar të informacionit të transportit. Ashtu sikurse edhe bashkitë që kanë rolin e tyre, jo vetëm të bëjnë transportin e tyre urban ndërqytetas apo qyteteve të tjera, por përmes E-transportit që përmenda pak më lartë, kjo do të ndihmojë më shumë për lëvizjen nga një destinacion në tjetrin”, thekson ajo.
Formalizimi i tregut të turizmit mbetet një çështje tjetër, ku turizmi nuk përkthehet në të ardhurat reale, çfarë do të bëni për të rregulluar këtë çështje?
“Ulja e taksës në 6% e strukturave akomoduese vite më parë, si një kërkesë që erdhi prej sektorit privat, ka pasur padyshim përfitimet e veta në buxhetin e shtetit, por jo plotësisht. Ata e bënë këtë kërkesë për të formalizuar dhe patjetër që kjo do të nxiste formalizimin, sigurisht që pati hapa formalizimi, por kjo nuk ishte një formalizim total. Nga ana tjetër, ka një formalizim tjetër, sepse në draft-ligjin që ne sot e kemi hedhur në konsultim publik, draft-ligji për turizmin ka propozime të reja për ta formalizuar pikërisht tregun turistik”, nënvizon ajo.
