Zëvendësministrja e Turizmit, Vilma Bello në një intervistë për Vizion Plus ka folur lidhur me vështirësi që turizmi po has në këtë sezon turistik dhe masat e ndërmarra për të garantuar siguri dhe tërhequr turistë.
Disa biznese janë kthyer në problem për ndotjen e ambientit në Vlorë, por ky fenomen haset edhe në zona të tjera. Ju si e keni adresuar këtë fenomen?
“Është e vërtetë, ky nuk është një problem tipik që karakterizon vetëm Bashkinë e Vlorës, sepse është një situatë në të cilën bizneset shpesh herë janë ndotësit më të mëdhenj, sidomos në pikun e sezonit dhe sidomos në këtë sezon ku fluksi i turistëve është rritur ndjeshëm jo vetëm në Vlorë, por përgjatë gjithë territorit shqiptar dhe është një situatë e adresuar. Ajo që mendoj se duhet të intensifikohet më shumë është dhe ka nevojë për një komunikim të vazhdueshëm, intensiv, të pandërprerë dhe të qëndrueshëm pushteti lokal së bashku me bizneset thekson ajo”, ndërsa shton se përtej vështirësive situata është drejt përmirësimit si pasojë e komunikimit, masave administrative dhe ndërgjegjësimit.
Fokusi gjatë këtij sezoni është më i shtuar drejt zonave bregdetare, por a ka problematika të tilla dhe në turizmin malor?
“Ne e kemi marrë një problematikë të tillë jo vetëm në zonat bregdetare, por edhe në zonat malore, në të cilat numri i turistëve edhe atje është rritur”, thekson ajo. “Kemi bërë një komunikim të drejtëpërdrejtë dhe të menjëhershëm me pushtetin vendor, qofshin këto prefektuarar, bashkitë e tjera dhe ka pasur një reagim të menjëhershëm”, thekson ajo duke shtuar se gjatë sezonit duhet një ekuilibër shumë i mirë mes pushteteve, ndërsa shkelësit e ligjit, sipas saj, do të ndëshkohen.
Si është bërë ndarja e plazheve këtë vit dhe a po respektohen hapësirat publike?
“Ndarje e plazheve sivjet ka qenë një proces që ka nisur shumë më herët se vitet e tjera, duke pasur parasysh se ne do të hyjmë në një vit zgjedhor dhe kjo është bërë që në tetor-nëntor të vitit të shkuar dhe në fund të vitit që shkoi këto ishin përmbyllur si procese, kontratat ishin firmosur. Në ato bashki që komunikimi ka qenë më i mirë, ka pasur një proces edhe më korrekt”, thekson ajo. “Përsa i përket ndarjes dhe në hartat që bën pushteti vendor, 30% ata duhet të përcaktojnë në plazhe publike, sigurisht që ana ligjore ata e kanë sepse janë të detyruar të zbatojnë ligjin. Problem mbetet vendet se ku ata i vendosin në hartë këto plazhe publike edhe pse ka një reagim dhe mua më vjen mirë që tashmë Bashkia e Sarandës ka reaguar me një plazh publik, me të gjitha parametrat, kriteret apo edhe në Vlorë është bërë kjo”, tha ajo duke shtuar se ky problem ka nevojë për monitorim të vazhdueshëm nga të gjitha hallkat e pushtetit.
Tre vitet e fundit dhe më së shumti këtë sezon veror duket se ka një fluks turistësh në vendin tonë, pse po ndodh kjo?
“Shqipëria tashmë nuk është më vendi ekzotik dhe i pazbuluar që të mund ta vizitojnë për herë të parë, nuk është kjo. Nëse vitet më parë Shqipëria ishte si vend i panjohur, tanimë ka mjaft turistë dhe statistikat që vetë operatorët na japin ka turistë që ende rikthehen”, shton ajo duke thënë se turizmi është kthyer në sektor prioritar nga qeveria, ndaj edhe po promovohet kudo.
