Në mbledhjen me kryetarët e degëve të PD-së, Lulzim Basha u ndal te data e mbajtjes së Kuvendit Kombëtar të partisë.
Ndërsa u shpreh se Kryesia e PD votoi që Kuvendi të thirret më 18 dhjetor, e jo më 11, ai akuzoi Berishën se nuk njeh asnjë institucion të PD dhe as vendimmarrje.
Qëllimi i ish-kryeministrit, sipas Bashës, është që ta shndërrojë PD-në në një mburojë të veten përballë Shteteve të Bashkuara të Amerikës.
“Kjo histori e përdorimit te demokratëve si mburoje e interesave personale te kujdo merr fund njehere e përgjithmonë. Kryesia e Partisë Demokratike votoi për mbledhjen e Kuvendit legjitim. Sali Berisha thotë se prapë nuk e njeh. Ku qëndron morali i statutit që me forcë ngre Sali Berisha? Çfarë po kërkon ai? Sali Berisha nuk e ka hallin te statuti, ai nuk njeh asnjë strukturë të Partisë, sepse qëllimi i tij është që partia të shndërrohet në një mburojë të tij përballë Shteteve të Bashkuara…Pse nuk e përmend më Sali Berisha faktin me të cilin nisi foltoren, sepse nuk u votua në Kryesi? Sepse ky ishte një justifikim. Ja ku është vendimi i Kryesisë me 28 vota pro për mbledhjen e Kuvendit, dhe ai përsëri thotë se njoh. Është e qartë se sido që të merrej ai vendim, me çfarëdo votimi, Sali Berisha dëshmon se nuk do ta njihte. Sepse sot ai nuk njeh asnjë organ zyrtar te PD.”
