Kryetari i Partisë Demokratike, Lulzim Basha ka takuar të premten banorët e Sukthit, për të cilët tha se ende vuajnë pasojat e tërmetit të 26 nëntorit dhe se nuk janë ndihmuar në këtë periudhë pandemie.
Në një postim në “Facebook”, Basha shprehet se banorët e kësaj zone janë braktisur dhe lënë në harresë.
“Sukthi dhe banorët e tij ende vuajnë pasojat e tërmetit të nëntorit. Asnjë ndihmë për banorët me shtëpitë e shkatërruara, asnjë kujdes për situatën e pandemisë që i ka çuar në varfëri të tejskajshme banorët e Sukthit. RAMAVIRUSI ka goditur rëndë këtë zonë dhe banorët e saj që sot më shumë se kurrë ndihen të braktisur dhe të lënë në harresë. Shtëpi të rrënuara dhe në pragshembje pas tërmetit, asnjë ndihmë financiare apo ushqimore, varfëri e shtuar, papunësi dhe mjerim. Kjo është gjendja e Sukthit sot.”
Kryedemokrati tha se gjendja shqetësuese e qytetarëve të Sukthit është dëshmi e qartë e pandemisë ekonomike që ka prekur shqiptarët.
“Rama i ka braktisur shqiptarët. Ai dhe oligarkët e tij kanë vetëm një qëllim, të vjedhin taksat e shqiptarëve për t’u pasuruar në kurriz të qytetarëve të braktisur pa ndihmë dhe kujdes.”
