Kryetari i Partisë Demokratike, Lulzim Basha ka zhvilluar një takim me disa investitorë italianë këtë të enjte. Ai i ka informuar investitorët për planin e demokratëve për të përmirësuar ekonominë e vendit dhe veçanërisht për të thithur investitorë të huaj.
Basha bëri thirrje që vendi të çlirohet nga krimi e korrupsioni me qëllim që të ketë konkurrencë të ndershme.
“Me politikat tona qeverisëse, Shqipëria një vend tërheqës për investimet e huaja. Sot u takova me drejtues të suksesshëm të industrisë, infrastrukturës, dhe logjisitikës, në rajonin e Friuli-Venezia-Giulia. I informova për planin tonë ekonomik, i cili nis me çlirimin e tregut nga krimi, nga oligarkia dhe korrupsioni si dhe nga burokracia. Përmes politikave ekonomike dhe lehtësirave për të bërë biznes, do ta kthejmë Shqipërinë në një vend tërheqës për investimet e huaja, konkurrues me çdo vend tjetër në rajon”
Lideri demokrat theksoi gjatë takimit se në fokusin kryesor të PD janë zhvillimi ekonomik dhe punësimi. Sipas tij, kjo mund të arrihet përmes investimeve të huaja.
Zhvillimi ekonomik dhe punësimi, janë prioriteti kryesor i PD. Investimet e huaja janë jetike për rritjen e punësimit dhe zhvillimin e ekonomisë. Plani ynë ekonomik ka një fokus të rëndësishëm në këtë drejtim. Por së pari duhet garantuar konkurrenca e ndershme dhe luftuar korrupsioni që sot i mban investitorët larg vendit tonë.
