Sekretari i Përgjithshëm i PD, Gazment Bardhi akuzoi kryeministrin Edi Rama se po shkatërron marrëdhëniet e Shqipërisë me SHBA. Reagimi i tij erdhi pas një deklarate të Ramës për kriminelët në listat e kandidatëve.
“Përgjigja e Ramës ndaj kërkesës së SHBA-ve që partia e tij të mos përfshijë kriminelë në lista- është e turpshme dhe e dëmshme. Edhe një herë Rama e turpëroi Shqipërinë dhe dëmtoi statusin e saj ndërkombëtar. Pas 8 vitesh në të cilat Rama shkatërroi ekonominë dhe vendin tonë, tani ai po shkatërron edhe marrëdhëniet tona me Shtetet e Bashkuara të Amerikës dhe Bashkimin Evropian. Për të sjellë ndryshimin dhe një të ardhme më të mirë në Shqipëri, ne duhet të largojmë Ramën – dhe kjo është pikërisht ajo që populli shqiptar do të bëjë në 25 Prill!”
Këtë të hënë Edi Rama ju përgjigj ambasadores amerikane Yuri Kim për figurat e pastra në lista, duke deklaruar se partitë bëjnë vetëm një verifikim sipas ligjit. Ai shtoi se në selitë e partive nuk mund të ngrihen salla torturash për atë që fsheh diçka.
