Drejtuesi politik i PD në Qarkun e Elbasanit, Gazment Bardhi zhvilloi një takim me një grup të rinj, të cilët kanë përfunduar shkollë profesionale.
Duke dëgjuar shqetësimet e tyre, Bardhi tha se ata do të stimulohen për të punuar pas 25 prillit, kur PD të marrë pushtetin. Demokrati shpjegoi se premtimet e PD nuk janë gënjeshtra.
“Ju jeni profesionistë që trokisni në treg, po për fat të keq, nuk gjeni shumë mundësi, sepse biznesi është në gjendje të vështirë dhe prej mungesës së mbështetjes dhe goditjes nga taksidarët, janë shkurtuar vende pune. Aktualisht nuk ka asnjë përkrahje. Por ne, pas 25 prillit do të vëmë në jetë planin tonë, që sjell stimulim të sipërmarrjeve të reja, përmes skemave të financimit që do i sigurojë qeveria. Unë nuk kam ardhur këtu që të gënjej, të marr një mandat, dhe pastaj të iki në një qark tjetër. Pas 4 vitesh do të jap llogari para jush për punën që kam bërë. Ne nuk kemi premtime, kemi angazhime konkrete. Nuk do të sjellim mrekulli, por do të sjellim normalitet. Një vend ku çdokush, çdo i ri të ketë mundësi për një punë e jetë normale.”
